‘आमने सामने’ नाटकातून रोहन गुजर, केतकी पालव यांना का काढलं? निर्माते मंगेश कदम, लीना भागवत यांनी सांगितलं कारण
‘Aamne Saamne Marathi Play Controversy अभिनेता रोहन गुजर आणि अभिनेत्री केतकी पालव यांनी आपल्याला नाटकातून अचानक काढून टाकल्याची तक्रार केली.
-
- Written By: Vishal Rohitkar Published:
Aamne Saamne Marathi Play Controversy: मराठी रंगभूमीवरील ‘आमने सामने’ या नाटकाभोवती सध्या चर्चेला उधाण आलं आहे. अभिनेता रोहन गुजर (Rohan Gujar) आणि अभिनेत्री केतकी पालव (Ketaki Palav) यांनी सोशल मीडियावरून आपल्याला नाटकातून अचानक काढून टाकल्याची तक्रार केली होती. मानधनवाढीची मागणी मान्य न झाल्याने आपल्याला नाटकातून बाहेर पडावं लागल्याचं त्यांनी सांगितलं होतं. त्यानंतर आता या नाटकाचे निर्माते मंगेश कदम (Mangesh Kadam) आणि अभिनेत्री लीना भागवत (Leena Bhagwat) यांनी आपली बाजू मांडली आहे. या संपूर्ण प्रकरणात ‘तिसऱ्यांदा मानधन वाढवून मागितलं’ हा महत्त्वाचा मुद्दा राहून गेल्याचं त्यांनी स्पष्ट केलं आहे.
नेमकं प्रकरण काय?
रोहन गुजर आणि केतकी पालव यांनी सोशल मीडियावर आपल्याला ‘आमने सामने’ या नाटकातून तडकाफडकी बाजूला करण्यात आल्याची भूमिका मांडली होती. मानधन वाढवून देण्याची मागणी पूर्ण न झाल्याने हा निर्णय घेण्यात आल्याचं त्यांच्या तक्रारीतून समोर आलं. मात्र, निर्माते मंगेश कदम आणि लीना भागवत यांनी या प्रकरणाची दुसरी बाजू सांगताना मानधनवाढीच्या मागण्यांचा क्रम स्पष्ट केला आहे.
पाच महिन्यांतच दुसऱ्यांदा मानधनवाढीची मागणी
लीना भागवत आणि मंगेश कदम यांच्या म्हणण्यानुसार, सुरुवातीला रोहन गुजर आणि केतकी पालव यांना मानधनवाढ देण्यात आली होती. त्यानंतर अवघ्या पाच महिन्यांतच दोघांनी पुन्हा मानधन वाढवून देण्याची मागणी केली. नाटकाला चांगला प्रतिसाद मिळत असल्याने आणि कलाकारांची मागणी रास्त असल्याचं लक्षात घेऊन निर्मात्यांनी ती मागणीही मान्य केली.
जॉन पॅप्सिडेरा ते मुकेश छाबरा : २०२६ मधील मोठ्या ब्लॉकबस्टर चित्रपटांमागील कास्टिंग डायरेक्टर्स…
मात्र, त्यानंतर वर्षभराच्या आतच पुन्हा एकदा मानधनवाढीची मागणी करण्यात आली. सलग तिसऱ्यांदा मानधन वाढवून देण्याची मागणी झाल्याने निर्मात्यांसमोर पेच निर्माण झाला. अखेर या परिस्थितीत कठोर निर्णय घ्यावा लागल्याचं लीना भागवत यांनी सांगितलं.
‘तिसऱ्यांदा मानधनवाढ मागणं अनपेक्षित’
मराठी नाटकाच्या निर्मितीमध्ये कलाकारांचं मानधन, प्रयोगांची संख्या आणि आर्थिक गणित यांचा समतोल राखणं महत्त्वाचं असतं. अशा परिस्थितीत वारंवार मानधनवाढीची मागणी होणं अपेक्षित नव्हतं, अशी भूमिका लीना भागवत यांनी मांडली. त्यामुळे या निर्णयाकडे केवळ कलाकारांना नाटकातून काढून टाकल्याच्या दृष्टिकोनातून न पाहता, निर्मात्यांची बाजूही समजून घेणं आवश्यक असल्याचं मत काही कलाकारांकडून व्यक्त होत आहे.
कलाकार विरुद्ध निर्माते, चर्चेला नवा विषय
या प्रकरणामुळे कलाकारांच्या मानधनाचा प्रश्न, निर्मात्यांची आर्थिक गणितं आणि व्यावसायिक नात्यांमधील संवाद हे मुद्दे पुन्हा एकदा चर्चेत आले आहेत. रोहन गुजर आणि केतकी पालव यांनी मांडलेल्या भूमिकेनंतर आता मंगेश कदम आणि लीना भागवत यांची बाजू समोर आल्याने या वादाला नवं वळण मिळालं आहे. काही कलाकारांनी निर्मात्यांच्या निर्णयाचं समर्थन केल्याने या प्रकरणाविषयी रंगभूमीवरील चर्चाही अधिक तीव्र होण्याची शक्यता आहे.
आता या प्रकरणात दोन्ही बाजू समोर आल्यानंतर कलाकार आणि निर्माते यांच्यातील मानधनवाढीच्या मागण्यांकडे कोणत्या दृष्टिकोनातून पाहिलं जाणार, हे महत्त्वाचं ठरणार आहे.
